【轉載】冷氣廢熱乾衣 洗衣舖慳電三成
【明報專訊】中華電力噚日舉行第四屆「環保節能機構」嘉許禮，得獎者之一嘅陽光洗衣便利店老闆就好有諗頭，話日日對住高用電量嘅乾衣機及冷氣機就頭痕，有一日忽發奇想，問吓中電有無計仔，將冷氣機排出嘅廢熱回收用作乾衣，意想不到，中電又buy呢個構想，真係搵工程師去實地考察兼做技術研究，最後搵到方法轉廢為能，仲幫洗衣店慳到三成電。陽光洗衣便利店𠵱家先喺一間分店做試點，睇吓呢個成功經驗，可唔可以喺其他分店應用。環境局署理常任秘書長劉明光噚日出席頒獎禮時，都話要畀個like各個得獎機構。
除咗商店要慳電費，學生都諗計為環境出一分力，獅子會中學學生就參與設計校園智能系統，喺課室加裝二氧化碳感應器，到達指定水平先開抽風系統，咁就能夠保持室內空氣清新之餘，又唔使因為長開抽氣扇抽走冷氣而嘥電。今次嘉許禮共有64個機構單位得獎。
001.jpg--中華電力總裁潘偉賢（左起）、環境局署理常任秘書長劉明光、中華電力企業發展總裁莊偉茵，噚日大讚得獎單位知慳識電，要畀個like佢哋。
页:
[1]